【阿才】
阿才阿才,天頂跋落來,
有嘴齒,無下頦,
有眼睛,無肚臍,
叫醫生,叫抹來,
叫師公,扛去埋。
【搖仔搖】
搖仔搖仔搖,搖到內山去挽茄,
挽外多?挽到一飯籬,也好食,
也好賣,也好乎嬰仔做度睟。
【羞羞羞】
羞羞,羞羞羞,捾籃仔抾雨鰡;羞羞,羞羞羞,捾籃仔抾雨鰡
攏總抾幾尾,哎喲,攏總抾兩尾啦,
攏總抾兩尾。一尾煮來吃啊,
一尾糊目睭啍,羞羞,羞羞羞。
【一的炒米香】
一的炒米香,二的炒韭菜;
三的強強滾,四的炒米粉;
五的五將軍,六的六子孫;
七的分一半,八的爬梁山;
九的九嬸婆,十的撞大鑼;
打你千,打你萬,打你一千擱一萬。
【放雞鴨】
一放雞,二放鴨,三分開,四做堆,
五搭胸,六拍手,七圍牆,
八摸鼻,九扭耳,十抾起。
【十二生相】
一鼠,賊仔名;二牛,駛犁兄;
三虎,爬山崎;四兔,遊東京;
五龍,皇帝命;六蛇,乎人驚;
七馬,跑兵營;八羊,食草嶺,
九猴,爬樹頭;十雞,啼三聲;
十一狗,顧門埕;十二豬,菜刀命。
【ABC】
ABC,狗咬豬;阿婆仔坐飛行機,
跋一下冷吱吱,去互醫生醫,
醫一下,跤骨大小支。
【貧憚仙】
一天過了又一天,身軀無洗全全鉎,
走去溪仔洗三遍,毒死烏魚數萬千。
【火金姑】
火金姑,來食茶,茶燒燒,配香蕉,
茶冷冷,配龍眼,龍眼會開花,仔換冬瓜,
冬瓜好煮湯,仔換粗糠,粗糠要起火,
九嬸婆仔賢炊稞,炊到臭火燒兼煮火。
【天黑黑】
天烏烏,欲落雨,
阿公舉鋤頭巡水路,
巡著一尾鯽仔魚欲煮菜,
魚舉燈,鱉打鼓,蚊仔噴鼓吹,
蜻蜓舉旗叫艱苦,水雞扛轎雙目突。